Xa temos invernadoiro!

A Comunidade de montes de Tremoedo regalounos este fantástico invernadoiro, para que poidamos convertirnos en labregos experimentados e aprender moito sobre as plantas, o solo e a compostaxe.
Pero antes de poñernos mans á obra, debemos coñecer as ferramentas que imos utilizar; saberiades dicirnos que ferramenta é cada unha? Seguro que as coñecedes, pero... sabedes os seu nomes en galego?


 Seguro que os avós e avoas as coñecen de sobra!

Xa chegou a primavera!

 
Por fin chega unha das nosas estacións favoritas!
Vai máis caloriño, saen as flores, os paxaros fan os niños....
Imos facer un traballo de investigación, lingoretas: buscade refráns ou ditos populares relacionados coa primavera. Podedes preguntar aos papás e mamás, e tamén aos avós. Os máis bonitos publicarémolos nunha entrada nova. A ver que atopades!

A casiña de Don Cuco

Pensabades que xa non íamos facer esta actividade, non si?
O caso é que como a biblioteca permaneceu pechada todo este tempo por reformas, decidiuse deixala para o mes de marzo.
Este ano teremos que investigar sobre os traballos das mulleres na comarca: redeiras, peixeiras, leiteiras....
Seguro que aprendemos un montón de cousas!
Xa sabedes que oficio vos toca invetigar?

Que viva o Entroido!

Peliqueiros, cigarróns, formigas e fariña!
Orellas, filloas e flores!
O Entroido en Galiza celébrase de moitas formas, pero todas elas teñen en común unha cultura ancestral que atrae cada ano a moitos turistas de diferentes países.
Lingoretas, como vivides vós o Entroido?
Contádenos de que vos disfrazades, que comidas típicas degustades...

Trompos, buxainas, pirindolas e demáis trebellos

Que ben o pasamos onte! Moitas grazas a todos pola vosa participación, lingoretas e familias. Aprendimos moitas cousas novas e de seguro que cando clausuremos a tempada de trompos seremos todos uns expertos na materia.
Os que aínda non tendes claro como bailar o trompo prestade atencion ao vídeo:

Cando o tempo o permita, comezaremos os campionatos de buxainas no campiño de terra que antes era o patio de infantil. Haberá que levarlle unha chea de ovos a Santa Clara para que non chova!

Manda truco!

O prometido é débeda. Estabades desexosos, non si?
Mirade que cousas máis chulas se poden facer coas buxainas!

Menudo fenómeno está feito este rapaz. A practicar moito, lingoretas!

Polo San Martiño, trompos ao camiño!

 
 Nenos e nenas, profes e conserxes,pais e nais, avós e avoas, cuicos e demáis bichería!
Estades todos invitados a inaugurar a tempada de trompos bailando as vosas buxainas, borrachas, peóns e bailaretes na hora do recreo.
Que non lle tendes aínda collido o truco?! Non pasa nada. Aínda temos moitos días para practicar, e en último caso haberá expertos no tema que nos ensinarán a bailalos con maestría e alegría.
Pero antes de correr hai que saber andar, como ben di o refrán. Empecemos logo coñecendo as partes do trompo:

E para os que xa saben bailar o seu peón, unha mensaxe:
estade antentos lingoretas, que colgaremos vídeos con trucos super alucinantes!

E xa chega o Samaín!

 
 E ven cargadiño de actividades! Aquí tendes o calendario semanal con todas as cousiñas interesantes que se van facer para que non perdades ningunha:
Martes 28: remata o prazo de entrega dos contos para o concurso de relatos terroríficos. Animádevos, que aínda tendes tempo!
Mércores 29:traemos as cabazas da casa para a exposición na ludoteca.
Xoves 30: visita arrepiante e guiada pola ludoteca para admirar as cabazas e pasar un pouquiño de medo; entrega de diplomas participativos; entrega dos premios do concurso de relatos aos mellores contos.
Mans á obra monstruíños, que hai moito que facer!

Letras Galegas 2014

O homenaxeado deste ano é Xosé María Díaz Castro, poeta orixinario de Os Vilares de Parga, Guitiriz (Lugo).
En 1946 publicou "Nascida dun sono" e "Nimbos", a súa obra máis importante.
Este poema é un dos máis coñecidos. Esperamos que vos guste:

Penélope. X. M. Díaz Castro

Un paso adiante i outro atrás, Galiza,
i a tea dos teus sonos non se move.
A espranza nos teus ollos se esperguiza.
Aran os bois e chove.

Un bruar de navíos moi lonxanos
che estrolla o sono mól coma unha uva.
Pro tí envólveste en sabas de mil anos,
i en sonos volves a escoitar a chuva.

Traguerán os camiños algún día
a xente que levaron. Deus é o mesmo.
Suco vai, suco vén, Xesús María!,
e toda a cousa ha de pagar seu desmo.

Desorballando os prados coma sono,
o Tempo vai de Parga a Pastoriza.
Vaise enterrando, suco a suco, o Outono.
Un paso adiante i outro atrás, Galiza!


Podedes contarnos que vos pareceu o poema. Lembrade que o noso blog aliméntase dos vosos comentarios.

Himno galego

Xa sabedes que os nosos símbolos de identidade son a bandeira, o escudo e o himno. Pero de seguro que necesitamos todos facer un repasiño á letra do himno, non si?

Gustouvos? Con subtítulos e todo, para que non teñades excusa! Saberiades dicirme quen é o autor do himno?

Un pouquiño sobre Rosalía

Rosalía de Castro é unha das máis importantes figuras literarias de todos os tempos, e por iso o día das Letras galegas celebrase o 17 de maio; porque "Cantares gallegos" (a súa obra máis importante) foi publicada precisamente ese día.
Neste vídeo poderedes apreciar unha das súas poesías máis famosas:

Esperamos os vosos comentarios!

Filloas e orellas

A ver que tal se vos da a cociña, lingoretas! Alguén sabe como preparar unhas saborosas filloas? E unhas orellas?Non? Pois collede papel e lápis!

Filloas
Ingredientes:
- 5 ovos
- 2 litros de leite
- 200 gramos de fariña
- un cacho de touciño
- sal
- azucre

Elaboración: 
Bate os ovos e mestúraos co leite e coa fariña, ata que quede feita unha crema líquida. Engade un chisco de sal. Colle despois o filloeiro ou unha tixola e úntaa con touciño ou graxa de porco. Reparte ben a crema líquida por toda a superficie, intentando que a filloa quede fina. Cando os bordos se despeguen sós, xa está dourada por un lado, así que dálle a volta ata que se doure polo outro.

Se as queres doces, coloca as filloas nun prato e bótalles azucre por riba.

Orellas

Ingredientes: 
- 1 ovo enteiro
- 2 xemas e 2 claras montadas
- 1 vaso de leite
- medio quilo de fariña
- 100 g de azucre 
- 50 g de manteiga fundida 
- unhas pingas de anís 
- a rela dun limón

Elaboración:
Mestura todos os ingredientes nun recipiente ata conseguir unha pasta compacta que non se pegue nas mans. Tápaa e déixaa repousar unha hora. Despois colócaa nunha superficie con fariña e estira a masa o máximo posible, intentando que quede unha masa moi finiña. Córtaa en forma triangular ou de orella de porco e bótaa nunha tixola con abundante aceite quente (se é posible, de oliva). Cando estean douradas é que xa están listas. Retíraas a unha fonte e bótalle azucre por riba.

Mmmm, que rico! Esperamos os vosos comentarios, e se queredes tamén podedes traer a proba. Bo proveito!

Entroido 2014

Xa está aquí! Xa chegou! Por fin poderemos vestirnos de choqueiros e facer falcatruadas polas rúas, comer lambetadas típicas deste tempo...
Para ir abrindo boca, mirade que vídeo tan chulo!

Gustouvos?

Concurso "deseña a túa camiseta"

Gústache a moda? Tes unha imaxinación desbordante? Pois este é o teu concurso!!

Ponte na pel dun famoso deseñador por un día e axúdanos a atopar un deseño rompedor e orixinal para a camiseta que os alumnos de 6º venderán este curso para recadar cartos para a súa excursión. Pode ser un debuxo divertido, unha frase enxeñosa.... 

As bases do concurso son as seguintes:

- Cada participante deberá presentar o seu debuxo na folla oficial do concurso, que poderedes recoller no edificio principal a partires de mañá.

- Poderedes deseñar só a parte dianteira da camiseta, a traseira ou ambalas dúas. 

- Aceptaranse debuxos ou frases graciosas e orixinais (nada de copiar, entendido?), pero sempre que sexan en galego.

- O prazo de presentación comeza mañá 21 de febreiro e rematará o venres 28 de febreiro. Deberedes deixar os vosos deseños no buzón que poñeremos no edificio principal.

- O gañador recibirá unha camiseta co seu deseño como agasallo.

Moita sorte e moito ánimo, lingoretas!

Marmelo de mazá

Unha marabillosa receita con froita de outono!

Ingredientes:

- 1 kg demazás.

- 500 gr de azucre.

- líquido espesante.

Preparación.

Lávanse as mazás e pelámolas; cortámolas en anacos non moi pequenos e cocémolas nunha pota durante 30-40 minutos xunto co azucre.De vez en cando remexede, lingoretas, ou apegarase.

Logo de cocelas, pásanse pola batidora para eliminar calquera grumiño que quedase, e que teñan unha textura máis fina. 

Por último, botámoslle o líquido espesante, batímolo todo e metémolo en botes previamente esterilizados. E xa temos marmelo para o almorzo. Mmmmm, que rico!

Esterilización dos botes:
Antes de comezar a facer o marmelo, é interesante esterilizar os botes para evitar contaminacións. Ferveremos os botes 10-15 minutos en auga, e despois escurrirémolos ben ata que sequen sen tocar o interior.

Os lingoretas das Chans dámoslle as gracias a Rosana e a súa familia por esta receita tan rica. De seguro que a imos disfrutar.

Día do trompo

O trompo ou peón é un dos xogos mais populares do outono. E como di o refran...polo San Martiño trompos o camiño. Este luns 11 de Novembro o CEIP San Bartolomeu súmase a esta convocatoria e durante o recreo faremos bailar todos aqueles trompos dos alunos e profes que queiran participar.

Agora un pouquiño de historia:




 Deixamosvos tamén un video explicativo para que vaiades practicando esta fin de semana.
http://tv.uvigo.es/gl/video/mm/18476.html



Mirade que dominio!!!

Seredes capaces? O luns comprobámolo!!

Corre, corre, cabaciña

E falando de outono e de cabazas, mirade que conto máis chulo atopamos na rede! Que bonito, verdade?

Receitas de outono

Que ben que xa chegou o outono! Pero de seguro que con este tempiño de chuvia non sempre podemos sair xogar fora. Velaiquí unha idea para poñer en práctica e que de seguro que vai gustar a toda a familia. Fagamos de cociñeiros! Ollo, sempre coa supervisión dos papás, os tíos, os avós...

Chulas de cabaza

Ingredientes (para 8 persoas)

• 250 gr de puré de cabaza
• 2 ovos
• 30 gr de azucre
• Unha chisquiña de canela
• 50 gr de fariña
• 1/4 de culleriña de levadura Royal
• Azucre glasé para espolvorear (se non temos, serve o azucre normal)
• Aceite de xirasol para a fritura.

Preparación

Asamos ou cocemos a cabaza, como prefiramos, aínda que asada solta menos auga. Unha vez teñamos o puré de cabaza listo, misturámolo cos ovos batidos, o azucre e o chisco de canela. Engadimos a fariña e a levadura, remexendo con un garfo ata que non haxa grumiños. 

Tapamos con papel film e deixamos repousar durante media hora mais ou menos. Despois deste tempo, a masa de seguro estará un pouco máis espesa. Remexémola un pouco para asegurarnos de que non quedan grumos no fondo.

Poñemos unha tixola ao lume, e cando o aceite estea quente, botamos porcións da masa con axuda dunha culler. As chulas estarán listas cando a masa estea un pouco dourada, así que moito ollo, cociñeiros!

Por último, sacámolas da sartén e poñémolas nun prato a arrefriar.( Podemos poñer papel absorvente na base do prato para eliminar o exceso de aceite.) Cando estean templadas, espolvoreamos o azucre e a larpeirar!

Benvidos ao novo curso!

Xa estamos de volta! E que mellor forma de comezar, que co noso primeiro concurso literario: Contos de terror
Podedes ver as bases do concurso no taboleiro de Normalización, e de seguro que nas vosas clases tamén hai unha copia. Como esta actividade facémola en colaboración co Equipo de Biblioteca, os mellores relatos formarán parte dun libro moi especial, o primeiro feito polos alumnos do cole do xénero de terror. E lembrade o prazo: dende xa mesmo ata o día 25 deste mes.
E por suposto, tamén haberá premios para os mellores.
Sacade as vosas plumas, e a escribir!

Non todo é o que parece

Isto do karaoke e todo un invento, non si? Polo visto a idea foi dos xaponeses, e nese país ten moito éxito! Aquí vos deixamos unha nova canción. Non volo perdades, que o vídeo é moi divertido. A disfrutar!